ტურიზმის ღირებულებათა ჯაჭვი ჰგავს გზამკვლევს,  რომელიც აჩვენებს ტურისტული გამოცდილების უზრუნველყოფის პროცესში ჩართულ ყველა საფეხურს. ის იწყება მოგზაურობის თავდაპირველი იდეიდან და გრძელდება ტურისტის სახლში დაბრუნებამდე. ჯაჭვის თითოეული რგოლი მოიცავს სხვადასხვა ბიზნესსა და მომსახურებას, როგორიცაა: ტრანსპორტი, განთავსება, რესტორნები და გიდები და სხვა. ტურიზმის ღირებულების ჯაჭვის ანალიზის საფუძველზე, ბიზნესს შეუძლია დაინახოს, რა ადგილი უკავია ტურისტული გამოცდილების შექმნის დიდ სურათში.

DEVCO-სა და UNWTO-ს მიერ შემოთავაზებული სქემის მიხედვით (Marion, 2013), ტურიზმის ღირებულების ჯაჭვი შეიძლება განისაზღვროს, როგორც პროცესი, რომლის დროსაც კერძო სექტორის წარმომადგენლები, სახელმწიფოსთან და საზოგადოებასთან თანამშრომლობით, იყენებენ სპეციფიკურ რესურსებს ღირებულების შესაქმნელად სხვადასხვა პროცესების მეშვეობით. (პროდუქტის ან სერვისის წარმოება, დაგეგმვა, ფინანსები, მარკეტინგი, დისტრიბუცია, განვითარება, მენეჯმენტი და ა.შ.) და ყიდიან საბოლოო პროდუქტსა და მომსახურებას ტურისტებზე.